ମୁଁ କିଏ?ମୋତେ ଦୁଃଖ କଷ୍ଟ ହୁଏ କାହିଁକି ?

ମୁଁ କିଏ? ମୋତେ ଦୁଃଖ କଷ୍ଟ ହୁଏ କାହିଁକି ?

   ମୁଁ ଅବିନାଶୀ ଓ ଅମର । ମୁଁ ଜନ୍ମ – ମୃତ୍ୟୁରହିତ ନିତ୍ୟ , ଶାଶ୍ବତ ଓ ସନାତନ ଜୀବାତ୍ମା , ଯଥା- ଗୀତାଶାସ୍ତ୍ରର ପ୍ରମାଣ
ନ ଜାୟତେ ମ୍ରିୟତେ ବା କଦାଚିତ୍
ନାୟଂ ଭୂତ୍ଵା ଭବିତା ବା ନ ଭୂୟଃ ।
ଅଜୋ ନିତ୍ୟ ଶାଶ୍ଵତୋୟଂ ପୁରାଣୋ
ନ ହନ୍ୟତେ ହନ୍ୟମାନେ ଶରୀରେ।।(୨/୨୦ )
ନୈନଂ ଛିନ୍ଦନ୍ତି ଶସ୍ତ୍ରାଣି
ନୈନଂ ଦହତି ପାବକ
ନ ଚୈନଂ କ୍ଲେଦୟତ୍ୟାପୋ
ନ ଶୋଷୟତି ମାରୁତଃ । ( ୨/୨୩ )

ଜୀବାତ୍ମାର ଜନ୍ମ ନାହିଁ କି ’ ମୃତ୍ୟୁ ନାହିଁ । ଜନ୍ମ ମୃତ୍ୟୁରହିତ ଜୀବାତ୍ମା ନିତ୍ୟ , ଶାଶ୍ବତ ଓ ସନାତନ । ତାହାର କ୍ଷୟ – ଲୟ ନାହିଁ । ଦେହ ବିନଷ୍ଟ ହୁଏ କିନ୍ତୁ ଆତ୍ମା ଅବିନାଶୀ । ମନୁଷ୍ୟ ଯେପରି ଜୀର୍ଣବସ୍ତ୍ର ପରିତ୍ୟାଗ କରି , ନୂତନ ବସ୍ତ୍ର ପରିଧାନ କରେ , ଆତ୍ମା ସେହିପରି ଜୀର୍ଣ୍ଣ ଶରୀର ଛାଡ଼ି ନୂତନ ଦେହ ଧାରଣ କରେ । ଆତ୍ମାକୁ ଅସ୍ତ୍ର କାଟିପାରେ ନାହିଁ , ଅଗ୍ନି ପୋଡିପାରେ ନାହିଁ , ଜଳ ଓଦା କରିପାରେ ନାହିଁ । ଜୀବାତ୍ମା କୌଣସି ସମୟରେ ଛିନ୍ନ , ଦଗ୍ଧ , ଶୁଷ୍କ ବା ସିକ୍ତ ହୁଏ ନାହିଁ। ସେ ଅବ୍ୟକ୍ତ , ଅଚଳ , ପରିବର୍ତ୍ତନହୀନ , ସର୍ବଗାମୀ , ଅନାଦି , ଅଚିନ୍ତ୍ୟ ଓ ନିର୍ବିକାର ।

ଆମ୍ଭମାନଙ୍କର ଏହି ପାଞ୍ଚଭୌତିକ ଦେହର ବର୍ତ୍ତମାନ ପରିଚୟ କଳ୍ପିତ , ମିଥ୍ୟା , ପରିବର୍ତ୍ତନଶୀଳ ଓ ନଶ୍ବର । ରକ୍ତ , ମାଂସ , ମଳ , ମୂତ୍ର , ବିଷ୍ଠାମୟ ଏହି ନଶ୍ବର ଦେହ କେବେହେଲେ ମୁଁ ନୁହେଁ । ମୁଁ ଓ ଦେହ ପୃଥକ ବସ୍ତୁ । ଶ୍ରୀମଦ୍ ଭାଗବତ କହନ୍ତି- ନଶ୍ବର ଜଡ ଦେହରେ ମୁଁ ବୁଦ୍ଧିକାରୀ ବ୍ୟକ୍ତି ମହାମୂର୍ଖ। ଦେହ ନାଶ ହେଲେ ମୁଁ ନାଶ ହୁଏ । ନାହିଁ , ଦେହ ଅନିତ୍ୟ ଓ ନଶ୍ଵର , କିନ୍ତୁ ମୁଁ ନିତ୍ୟ । ଦେହର ମୃତ୍ୟୁ ହୁଏ କିନ୍ତୁ ମୋର ମୃତ୍ୟୁ ବା ବିନାଶ ହୁଏ ନାହିଁ । ଏହି ଦେହ ବେଳେବେଳେ ହିନ୍ଦୁ , ମୁସଲମାନ , ଜୈନ , ଖ୍ରୀଷ୍ଟିୟାନ , ବ୍ରାହ୍ମଣ , କ୍ଷତ୍ରିୟ , ବୈଶ୍ୟ , ଶୂଦ୍ର , ସ୍ତ୍ରୀ , ପୁରୁଷ , ନଫୁସକ , ପଶୁ , ପକ୍ଷୀ , କୀଟ , ପତଙ୍ଗ ଇତ୍ୟାଦି ବିଭିନ୍ନ ଆକାରରେ ଦୃଷ୍ଟ ହୁଏ ଓ ବିଭିନ୍ନ ନାମରେ ପରିଚିତ ହୁଏ । କିନ୍ତୁ ଜୀବ ଶରୀରର ଏହି ସମସ୍ତ ପରିଚୟ ମିଥ୍ୟ , ଅନିତ୍ୟ ଓ ନଶ୍ୱର । ଜୀବାତ୍ମା ହିନ୍ଦୁ , ମୁସଲମାନ , ଜୈନ , ଖ୍ରୀଷ୍ଟିୟାନ୍ , ସ୍ତ୍ରୀ , ପୁରୁଷ ବା ନପୁଂସକ ନୁହେଁ । ମୁଁ କୌଣସି ଜାତି ବର୍ଣ୍ଣ ବା ଆଶ୍ରମର ଅନ୍ତର୍ଭୁକ୍ତ ବସ୍ତୁ ନୁହେଁ । ମୁଁ ଭଗବାନ ବା ବ୍ରହ୍ମ ନୁହେଁ । ଭଗବାନ ବିଭୁ – ଚୈତନ୍ୟ , ମୁଁ ଅଣୁ ଚୈତନ୍ୟ । ଭଗବାନ ପ୍ରଭୁ , ମୁଁ ଦାସ । ଭଗବାନ ମାୟାର ଅଧୀଶ୍ବର , ମୁଁ ମାୟାର ଅଧୀନ । ଭଗବାନ କେବେହେଲେ ମାୟାର ବଶୀଭୁତ ହୁଅନ୍ତି ନାହିଁ କିନ୍ତୁ ମୁଁ ସର୍ବଦା ମାୟାବଶଯୋଗ୍ୟ । ଭଗବାନ ନିତ୍ୟ , ମୁଁ ବି ନିତ୍ୟ । ଭଗବାନ ବିଭୁ – ସଚ୍ଚିଦାନନ୍ଦ , ମୁଁ ଅଣୁ ସଚ୍ଚିଦାନନ୍ଦ । ଆମମାନଙ୍କର ଜ୍ଞାନ ଓ ଶକ୍ତି କ୍ଷୁଦ୍ର ଓ ସୀମିତ , ଭଗବାନଙ୍କର ଶକ୍ତି ଅସୀମ ଓ ଅନନ୍ତ । ମୁଁ ଅଂଶ ସେ ପୂର୍ଣ୍ଣ । ତାଙ୍କୁ ଭୁଲିବା ଦ୍ଵାରା ହିଁ ଦୁଃଖ କଷ୍ଟ ହୋଇଛି । *ସଂଗୃହୀତ*

✿❁❣️༒ ଜୟ ଜଗନ୍ନାଥ ༒❣️❁✿